اسلام آباد 27 مئي (اے پي پي)د اطلاعات٬خپرونو٬قامي ورثه او كلتور وفاقي وزير عطاﺀالله تارړ وئېلي دي په زندان كښې ناست سړے په سفارتي ډګر ترلاسه كاميابۍ او د هېواد پرمختګ هضم كولې نه شي٬د يو خاص ډنډورې له مخې هېواد د 71 غوندې حالاتو سره د سمولو هڅه كېږي٬د هغوي عزائم چرې هم كاميابېدې نه شي٬پاكستان به پرمختګ كوي او مخ په وړاندې به ځي۔د ګل په ورځ پي ټي وي هېډ كوارټر كښې پرېس كنفرنس ته وينا كښې د اطلاعات وزير ووئيل پاكستان ته په سفارتي ډګر كاميابۍ ترلاسه كېږي٬په دې د لوئي څښتن شكر ادا كوو۔ده ووئيل وزيراعظم په تېرو ورځو كښې د ناروے او آئرلينډ وزيراعظمانو سره ټېليفوني خبرې كړي٬ناروے او آئرلينډ د مينځني ختيز په صورتحال خپل قوي موقف خپلولو سره غزه او رفح كښې د روانو ظلمونو غندنه كړې او په جنګ بندۍ ئې زور راوړے كوم چې د مړانې اقدامات دي۔دغسې وزيراعظم د هغوي سره په رابطه كولو د هغوي د موقف تائيد كړے۔ده ووئيل وزيراعظم د دواړو هېوادونو وزيراعظمانو سره د خپلو خبرو په مهال په دې خبره زور راوړے چې پاكستان عمر له د فلسطينيانو كاز لپاره غږ پورته كړے۔ده ووئيل وزيراعظم د آئرلينډ او ناروے وزيراعظمان د خپل موقف څخه خبر كړي۔ده ووئيل د تېر پي ډي اېم حكومت په مهال هم وزيراعظم يو اېن جنرل اسمبلۍ ته خطاب كښې د فلسطينيانو د حق خبره كړې وه دغسې ورلډ اكنامك فورم كښې هم وزيراعظم واضحه موقف خپل كړے ؤ چې په غزه كښې د امن نه غېر په نړۍ كښې امن نشي راتللے ۔ده ووئيل دا د پاكستان حكومت واضحه پالېسي ده٬مونږ په فلسطين كښې امن غواړو٬د جنګ بندول غواړو٬په غزه او رفح كښې دې ظلمونه بند كړې شي۔ده ووئيل مونږ د غزه اولس سره د يووالي څرګندونه كوو او غواړو چې د اوږدې مودې حل لپاره اقدامات وكړے شي۔د اېس آئي اېف سي په اړه په خپلو خبرو كښې د اطلاعات وزير ووئيل مونږ مرسته نه تجارت غواړو٬مونږ تجارت او سرمايه كارۍ ته وده وركول غواړو۔ ده ووئېل د اېس آئي اېف سي ترمخه ون ونډو آپرېشن روان دے٬د دې له مخې د نړيوالو سرمايه كارو سهولت لپاره 7 ډيسكونه جوړ شوي چې پكښې چين٬قطر٬يو اے اي٬سعودي عرب٬اروپائي ائتلاف٬امريكا او د ختيزې آسيا هېوادونو ډيسك شامل دے كوم به چې په پاكستان كښې سرمايه كارۍ ته پام لرنه كوي۔وفاقي وزير ووئيل متحده عرب امارات پاكستان كښې سرمايه كارۍ لپاره لس اربه ډالره بېل كړي٬په دې حقله د يو اے اي سركاري نيوز ايجنسۍ هم خبر جاري كړے۔ده ووئېل د سعودي عرب سره د پنځه اربه ډالره سرمايه كارۍ په حقله هم خاص پیشرفت شوے٬ډېر زر به لوظ نامې لاس ليك شي او لوظ نامو ته به حتمي شكل وركړے شي۔ده ووئيل په يو څو ورځو كښې وزيراعظم د چين دوره هم كوي٬په دې مهال به د سي پیك په اړه چارې مخ په وړاندې بوتللو پشمول د چين د وګړو امنيتي اندېښنې لرې كړې شي۔د دغې دورې په اړه تيارۍ روانې دي٬ده ووئيل مونږ كرنټ اكاؤنټ خساره كمه كړې٬زمونږ د آئي ټي برآمدات زيات شوي٬په ګرانۍ كښې كمے راغلے٬ ده ووئېل دا زمونږ لوئې كاميابۍ دي٬ده ووئيل د زر مبادله پانګې زياتې شوي٬معيشت مستحكم كېږي٬نړيوالې مالياتي ادارې هم د دې تقليد كوي۔ده ووئيل د پي ټي آئي مشر د خپلې سياسي بقاﺀ لپاره د پاكستان سلامتيا زيان سره مخ كړې٬د خپلې ګټې په خاطر د پاكستان زيان شوے٬هغه آئي اېم اېف ته خط ليكلے او وئېلې يې دي چې آئي اېم اېف دې د پاكستان سره لوظ نامه نه كوي او بيا بيا د پاكستان د ډيفالټ كېدو خبره كوي٬ده ووئيل د سياسي ګټې لپاره هغه اولس ته سائفر ښودلے او د دغې د هېواد دښمن قواؤ ته ګټه رسېدلې٬په ټوله نړۍ كښې د پاكستان نامه بدنامه شوې٬زمونږ دښمنانو په دې اړه آرټيكل ليكلے او پروګرامونه ئې كړي۔وفاقي وزير ووئيل په 2018 كښې چې كله دوي په اقتدار كښې راغلل نو د جي ډي پي ګروت 5.8 فيصد ؤ ٬د هغوي په بشپړ دور كښې د جي ډي پي ګروت منفي ؤ ۔ده ووئيل هغوي په خپل ټول دور كښې د توشه خانې سامان په خرڅولو تېر كړے۔هغوي د معيشت او ملګرو هېوادونو سره د اړيكو هېڅ فكر نه دے كړے او نن خپل ځان د مظلوم ثابتولو هڅې كوي۔
په زندان كښې ناست سړے په سفارتي ډګر ترلاسه كاميابۍ او د هېواد پرمختګ هضم كولې نه شي٬د يو خاص ډنډورې له مخې هېواد د 71 غوندې حالاتو سره د مخ كولو هڅه كېږي۔عطاﺀ الله تارړ
مضمون کا ماخذ : como jogar lotomania
متعلقہ مضامین
